Stiftung des Bruders Jelis von Achen und der Schwester Alveradis vom Bongart:Wir Richarda van Rifferscheit Abdissa van Gotz genaden ind gemeine Convent van Sent Claereu zo Nuesse doen kont allen luden die desen brief sollen sien of hoeren, dat broder Jelis van Achen zor zit Custer zo Collen ind Suster Alverit van dem Bongart ein medesuster in onsem cloister zo der eren Gotz umb heil erer seien ind aller erer frunde und maghe dae si ir gut af entfingen of dar si vor begerende sint Ons gegeven und upgedragen han 24 malder roggen und 10 gulden, umb memorien zo doin da van der si begerende sint so als hirna geschreven steit. Zo dem eirsten han wir 3 malder roggen, wilch dit convent Peter Harserde plach erflich zo geven van der leimkulen. Item zo Höingen an eime erve dat genant is zo Wideshoven van einer betzimmerder hovestat ind 9 vierdel lantz 1 malder weis ind 1 1/2 pont was. In dem lande van Milendonc 4 malder roggen van 9 morgen lantz ind 11 morgen husch ind broichs. Zo Holtzbutge van einem hove de wal betzimmert is ind vrie guet ind 48 morgen ind van eime beinden ind van einer holtzgewalde 11 malder roggen ind 11 malder ersen; ind dat 1 malder weis und die ersen schetzen wir vor 6 malder roggen zom minesten. Item 10 gulden, 20 1/2 albus vor den gulden, in der brucstraessen an dem huise, dat die broeder van Collen ons verkouft han na inhalt der breive dar up gemacht. Summa 24 malder roggen ind 10 gulden. Dit is nun dat sie begerent dair vor ind hie van zo doin ind us zo geven. Zo dem eirsten sal man dem priester, der die hoemisse singet up den hilligen kirsdach 3 albus geven, dar umb sal der priester pausiren in dem evangelio na Et verbum caro factum est also lange, dat man 5 pater noster lesen mach. Item dem offermanne 1 wispennig, up dat hei den priester ermaenen sal ind informiren, dit zo doin, ind wanne der priester des nit en deit, so en sal der convent ouch nit verbonden sin, priester ader offermanne iet zo geven. Item man sal halden 4 jairgetzide, dar zo sal man nemen 12 malder roggen. Det eirste jairgetzit sal man halden up vigilia annunciacionis dominice, up denselven dach nemen 3 malder roggen ind da van geven zweierleie gerichte van vischen gesoeden ind gebraeden mit crude of in peffer, wie man dat wilt, ind dar zo ietlich suster ein porcie gudes wines vor broder Jelis und suster Alverit vor erer beider vrunde ind da si vor begeren. Dat andere jairgezit sal man halden allewege des neisten sondages na Francisci, so sal man nemen 3 malder roggen, van wilchen man geven sal rintfleisch ind gut gebraet dar zo von gensen ader antvoegeln, ind ietlich suster eine porcie gudes wines dar zo vor broder Jelis ind suster Alverit vurschreven ind alle deijene dar si dat vor begerende sin. Item up den selven dach dat broder Jelis stirfet int vort alle jair als sin jairgezide is, up den selven sal man aver nemen 3 malder roggen zo zweierleie gerichte van vische oder vleisch wie dat genoget ind ein porcie gudes wines up den selven dach einer ietlicher suster zo geven, it en were dan sache, dat ein grois hoegeziet of eine groisse vigilie dan were, want so sal dat zer stund des anderen dages erfallen. is it aver gudensdach of saterdach, so sal man geven zweierleie gerichte van vischen ind nit warden des fridages, umb af zo trecken dat man fridags plit zo geven. is it aver sondach, maendach, dinsdach ader donersdach, so sal man geven vleisch mit crude gesoeden ader in peffer ind gebraet dar zo, so wat dan zidich is. it en were dan sache dat he storfe up einen fridag of in dem advente ader vasten, want so sal man geven vische ind dat herliche und kostliche ind tzweierleie gerichte. Item 3 malder roggen up den dach als suster Alverit stirft ind vort alle jairs up den selven dach sal man doin in alre maissen als vurschreven is in broder Jelis jairgezide, wie dat gut genoget mit dem selven up wat dages of up wat gezide. Ind die Abdisse sal truwelich broder Jelis vurschr. zo allen ziden recommenderen den susteren zo der tafelen. Item so han si begeret, dat man in desen jairgeziden, als man dese pietancien sal geven, dat die suster ouch dan allewege requiem sollen singen up den selven dach of in der selver wechen ind nit vorder vertrecken ind sal man ouch zwei missen singen darumb ind commendacionen na der missen. ind wanne dat onser liever frouen lof us is, Audi nos singen ind des avendes vigilie lesen. Item allewege des jairs wanne dat jairgezide is suster Lisen van dem Bongart onser medesusteren die ein suster is van suster Alverit vurschr. als man ere vigilie lieset, die er geburt van ordens wegen ind recht, so sal man broder Jelis vurschr. ein collecte mit geven ind des selven avendes ietlich suster ein porcie gudes wines geven, it si zor collacien of zor tafelen und recommendiren broder Jelis ind suster Alverit vurschr. ind ir suster Lisen. Item 12 malder roggen ind 10 gulden sal man keren alzo maele an win den susteren zo schenken, als man deit mit des convents wine, erflichen ind ewentlichen in desen maissen zo 4 hoegeziden mit namen purificacien onser liver frauen, Petri et Pauli, sent Ciaren dach, sent Franciscus ietlicher suster 1/2 quart wines. Item zo 6 hoegeziden hir na geschreven ietlicher suster ein porcie gudes wines des avendes zo collacien of zor tafeln, zom eirsten up den hilligen kirstesavend na vesperen ein porcie gudes wines, up sent Quirins hoegezit, up den dach sent Kathrinen, sent Lucien dach, alle des avendes, sent Barbaren dach des morgens, want man dan des avendes win gift van Cothusen jairgezide, item up sent Gertruden dach des avendes in der vasten, ind dan sal man geven einer ietlicher suster ein porcie wins ind recommendiren onser vader den minister broder Heinrich van Werle, meister in der gotheit, der desen selven brief besiegelt hat. Item noch 12 dage naschreven ietlicher suster ein porcie gudes wines zo geven des avendes up die 6 sonnedage in der vasten ind 6 fridage tuschen paschen ind pinxten des avendes, ind want des fridapes vor pinxten [am Tag der Stadtprozession zur Ehre des h. Quirinus] die stat Nuess begerent si ind willent, dat man alle wege des avendes den win geven sal, up dat man nommerme den susteren af en trecke des morgens, wat en wines geboeren mach van dem Cloister. Vort so heft onser broder Jelis besorget ind doin machen onse kachelstofe, dar zo sal man von den 10 gulden nemen 30 albus zo berne holtze in der stoven. wie wal dat die stove grois sparet an holtze, doch so willen sie dat man den susteren nit af en trecke den troist des avends in dem reventer, dat man al wege intsengen sal als man plach zo doin. Item dat silver dat ons laissen broder Jelis und suster Alverit vorschreven of dat wir moigen na irem afleven van dem erve winnen, als begeren si, dat man verkoufe ind gelde rente dar umb. mer wat die sustern binnen des cloisters gelden willen of loisen, sollen sie ein ietlich stuck dar van ein loit meir han an gewichte vur anderen, dat gelt sal man aver belegen zo volleist zo vollebrengen alle dese vurschreven punten. Item broder Jelis ind suster Alverit vorschreven sollen gebruichen deses ires gudes ind geldes ir leven lanck sunder onser wederspraiche, ind of suster Alverit aflivich wurde, so sal der convent besorgen ind gutlichen broder Jelis geven die vurschreven rente, ind wat hei dan ons van minne gift, dat sollen wir nemen van siner gunst ind nit van recht, so lanck als hei levet. Item dese vurschreven 24 malder roggen, 10 gulden ind renten van dem silvere of wat me dar zo gegolden wirt ofte sal werden, dat sal man signiren bi ein willige spende ind en sal man nit rechenen in des convents gude, mer man sal it rechenen ietliches jairs bisonder in dem advente na der kornrechenschof, als dan alle dese memorien wail uisgericht sint, so als des begeren broder Jelis ind suster Alverit vurschreven. ind of dan iet overt dar an, dat sal man keren in des convents orber, wie die abdisse wilt ind guit donket, up dat ein jair dem andern zo hülfe kommen moige [einige Worte sind unleserlich]. Of man aver in dieser vurschreven petancien gebreck hat, dat dese guide ofte renten sich minnerten, als alle dinck gebrechlich ind vergenclich sin, so sal dit afbrech an dem vurschreven win sin und keinerlei wise an den vurschreven werken. Item so sal man dese renten noch verkoufen, besweren noch versetzen, ind were dat sache, dat dit nit gehalden en wurde, so sollen die broeder van Nuess die selve rente loissen allemal mit einer guder maltzit, sunder allerleie widerstant geistlichen ader werentlichen gerichtes. Dit ind alle vurschreven punten han wir Richarda abdisse ind gemeine convent gelovet in guden truwen vor ons ind onsen nakomlingen, stede ind vast zo halden zo ewigen dagen, ind zo der meister sicherheit ind steder vasticheit, so han wir erkoren, of die 4 jairgezit alsus nit gehalden en wurden ind in den vorschreven dagen der win nit gegeven en wurde, so sollen die susteren vrien oirlouf han, den broedern dat zo offenbaren, ind so sal man zerzit der abdissin und dem convent heischen also vele geldes of kornes, als up den dach versumet is na inhalt deses brieves, ind dat geloven wir den broedern zo geven in ganzer wairheit gelich dem gelde, dat sie upheven van den missen, sonder widersprechen. Ind up dat alle dese vurschreven punten wal gehalden werden zo der eren godes also lange als dit cloister steit, so han wir gebeden onsen lieven erwerdigen geistlichen vader, den minister vurschreven, dat he sines ammetes sigel mit des cloisters sigel der broeder van Nuiss und mit dem sigel onses gemeinen convents an desen brief will hangen. Dat ich broder Heinrich minister vurschreven ind wir broeder des convents van Nuiss umb bede willen beider partien gerne gedain han. dat wir alle vurschreven punten deses brieves mide vestigen ind bezuigen. Ind wir abdisse ind gemeine convent sent Claren vurschreven dar na ouch onsen gemeinen conventes sigel vurschreven han dit zo getzuigen, bekennen und believen alle punten vurschreven mit vordachten willen und walberaeden moide an desen brief gehangen.
