Transkription: Wyr Dietherich Muntz, scholtheis zu Duisseldorff, Adolff vann Pempelfuirdt unnd Ewalt Baichmann, beide scheffen // daselbst, doin khundt unnd bekennenn offentlich oever mitz diesen brief, dat fur uns komen unnd erschienen seindt, die // bescheidenn Henrich Beeckman und Albert, ehelude unnd havenn in einen vasten steden kouf uf einen widderkouf // verlassenn unnd verkouf deme wirdigen und erparenn herren Peteren van Bonna, canonichen der collegiaten // kirchenn alhie binnen Duisseldorf sinen ervenn of dem helder diszbriefs mit irem willenn drei daller jair- // liger gewisser erbrenthen, als umb eine bescheiden somma geltz mit namen seszich enckel bescheiden ufrechtige // daller derenn sie die verkeuffere vann gedachtem gelder sich ginder betzalungh bedanckt. Und haven demnach // geloft fur sich und ire erven die drei daller jairliger gewisser erbrenthenn, darvan hinfordt alle jairs uff // des hilgenn sacramentz dagh doch vierziehen tage negst darna onbefangenn deme vursz. gelder seinen erven of // dem helder vursz. frej losz ledich unnd allenthalben gantz onbeschwiert in ire vrej sicher gewaldt und behalt zulie- // verenn unnd wolzubetzalen. Und der betzalungh also wie vursz. zu merer sicherheit zugeschehen haven g[enann]te // eluide fur sich und ire erven deme gelder vursz. seinen erven obg[enan]t zu einem verwille kuirden underpandt // gesatzt und veplichen, in kraft diszbriefs verbunden jr huisz uf dem Hunntzruggen gelegen, ein sid Alf Karssen, die ander // Herman Somer, ein heupt die strait, dat ander Agatha Zwicks. Also unnd of es sach were, das sie oder ire erven // ann lieverungh unnd betzalungh der obgemelter jairliger erbrenthenn jnich [ß] jairs uf termins tagh und zeit // vursz verbriechenn seumch of bruchlich befundenn wurden, jnn deill of zumaill, wie solichs zuqueme des // sich niet zuentschuldigenn, sunder sall damit dat underpandt vursz. dem obg[enann]ten geldere heimgefallenn // sin unnd plibenn mit aller ufkumpsz zuniessenn unnd zugebruichenn so lange unnd derzeit zu dat inenn // nagemelte heuptsomma alle hinderstendige anbetzalte termine mit samt denn chosten unnd schadenn so dar- // umb gedain of geleden werenn in einer allinger ongedeilter sommen gantz deger unnd wolbetzalt wurdenn. // Da aber gedachter gelder mit diesem underpandt niet genochsam verwart were, sall er sich dessenn altzit an der // verkeuffere anderm erb unnd guidern erhalen. Sunder indragt doch was zeit unnd wanne die vursz. // verkeuffere oder ire ervenn komen unnd brengenn jnich jairs hernachmals uf termins tag und zeit vursz. dem // obgemelten gelder sinen erven of dem helder vursz. mit namen seszich enckell bescheiden ufrechtige daller // ongedeilter sommen und mit einem erschienen sampt allen onbetzalten terminen sullen sie darmit sich der // erbrenthenn ob[genann]t erleddigt ire underpandt gefriet unnd diesen brief, doit und machtloss gemacht haven, doch sol // die loisz niet angenomen werden, sei en sie dann ein fierdels jairs zuvorn ufgekuindigt. Alles ohn gefherdt // unnd argelist. Bekennenn wir obgemelte scholtis unnd scheffen, dat solichs in aller maissen, wie vursz. so vor uns // bekant ergangenn unnd mit gewontlichenn urkunden verbundenn ist, unnd des den zu getzuichnisz hab ich De- // derich Muntz, scholtis vursz. minenn siegel unden an diesen brief gehangenn. Dweil auch wir scheffen // obgedacht ann unnd bi dieser handlungh gewest unnd die wie vurg[enann]t also fur uns ergangen ist, so haven wir uf // flissich begerenn beider parthien solichs ann unsere mitstoilbroider gelangt, also das wir semmentlige // scheffenn zu Duisseldorff unsenn gemeinen amptzsiegel an diesen brief auch gehangen. Der gegeven // ist jnn den jairn Christi vunftziehenhundert und nuinundvunftzich an des hilgen sacramentz avent.
